انا كنت قاعد بتابع حلقة مني الشاذلي بتاعة موضوع العبارة والحكم اللي اتاخد وبحضور الاطراف جميعا محامي ممدوح اسماعيل وحمدي الطحان ودكتور محمد الله يكون في عونه وحقيقي تابعت الحلقة كلها وانا هنا مش حتكلم في موضوع العبارة او الحكم اللي صدر ولا اي حاجة من دي انا عندي ملاحظة تانية لو تبعتم الحوا ر في الحلقة دي وفي جميع الحلقات المشابهة وبرامج الحوار التانية حتلحظوا ان في دايما اراء مختلفة وان كل واحد مقتنع برأيه تماما وكل اللي يهمه ان الطرف التاني يقتنع برأيه حتي انه مش بيحاول يفند الراي ولا يناقشة و لا يشوف اذا كان في حتي جانب صحيح ممكن يكون ارضية مشتركة نبدأ منها علشان نوصل للحقيقة دة مش موجود زي المستحيلات التلاته طيب ننقل علي الحورات الدينية نلاقي نفس المشكلة بالظبط كل حاجة فيها اكتر من راي وده وارد وكان زمان بيقولوا ان ممكن ناخد اي راي من المذاهب ويبقي حلال لان كلها اجتهادات لكن دلوقتي لا دة رايه صواب لا يحتمل الخطأ والتاني رأية خطأ ولا يحتمل الصواب والله يرحم كل الائمة الكبار
السؤال هنا ده راجع لايه هل لان احنا عندنا مشكلة في التربية ونظام التعليم اللي في الاخر بيوصلنا لطريقة التفكير دي ولا ده عادة وطبع متوارث صعب تغيره ولا غضب من ربنا علينا او ممكن يكون قلة حريه نتج عنها عدوي دكتاتورية في جميع الاشخاص علي جميع المستويات وممكن يكون لازم نتربي كلنا من اول وجديد
وربنا لما وزع العقول كل واحد استكيف بدماغه ولما وزع الارزاق مدش عجبة رزقه وعجبي